శివ పురాణం మహత్యం 🙏 మహా శివరాత్రి ప్రత్యేకం

తావత్కిల మహోత్పాతాః సంచరిష్యంతినిర్భయాః ! యావచ్ఛివపురాణం హినోదేష్యతి జగత్యహో !! శివపురాణం వినేవరకు మాత్రమే యమ కింకరుల భయం ఉంటుంది. అది దొరికితే వాళ్ళ భయం అక్కరలేదు. ఇతర చిన్న చిన్న శాస్త్రములన్నీ ఎంతవరకూ గర్జిస్తాయి అంటే శివపురాణం అనే సింహం గర్జించేవరకూ. సర్వ తీర్థములు సేవించిన ఫలం , సర్వ దానఫలం , శివపురాణ శ్రవణం వల్ల లభిస్తుంది. సర్వ సిద్ధాంత సారము శివపురాణంలో ఉన్నది. తథాపి తస్య మహాత్మ్యం వక్ష్యే కించిత్తు వోనఘాః ! చిత్తమాధాయ శృణుత వ్యాసేనోక్తం పురామమ !! ఆ దివ్యమైన మహాత్మ్యాన్ని , ఫలాన్ని చెప్పడం నావల్ల కూడా కాదు అన్నాడు సూతపౌరాణికులు. ఫలం వక్తుం న శక్నోమి కార్త్ స్న్యేన మునిసత్తమాః" దానియొక్క ఫలాన్ని నేను వర్ణించలేను. ఏతచ్ఛివపురాణం హి శ్లోకం శ్లోకార్థమేవచ! యః పఠేద్భక్తి సంయుక్తస్సపాపాన్ముచ్యతే క్షణాత్ !! శివపురాణంలో ఒక్క శ్లోకం గానీ , శ్లోకంలో సగం గానీ భక్తిగా చదివే వాని పాపం ఆ క్షణంలోనే నశిస్తుంది. భక్తి అనగా శ్రద్ధతో కూడినది. శ్రద్ధ అంటే ఇది సత్యము అనే విశ్వాసమే శ్రద్ధ. అలా భక్తితో ఒక్క శ్లోకంగానీ , శ్లోకార్థం గానీ చదివితే పాపములు నశిస్తాయి.